Projekti “Tradita Akademi”, i zbatuar nga Fondacioni Tradita Popullore me mbështetjen e Ministrisë së Kulturës, synoi fuqizimin e të rinjve dhe promovimin e trashëgimisë kulturore shqiptare përmes edukimit dhe krijimtarisë.
Projekti u lançua në prill 2025, me përzgjedhjen e 10 të rinjve që ndoqën një program gjashtëmujor trajnimi.
Gjatë muajve maj–tetor 2025, pjesëmarrësit zhvilluan trajnime dy herë në muaj me artizanë dhe specialistë të fushës. Ata u njohën me rëndësinë, statusin dhe simbolikën e veshjes tradicionale shqiptare, si edhe me elementët identifikues të krahinave shqiptare dhe mënyrat e integrimit të tyre në veshjet bashkëkohore.
Një pjesë e veçantë e programit iu kushtua xhubletës, ku të rinjtë studiuan elementët karakteristikë të saj dhe krijuan skica që ndërthurën traditën me dizajnin modern.
Në përfundim të procesit, u përzgjodhën 10 skicat më të mira, të cilat u realizuan në bashkëpunim me artizanët, duke u shndërruar në veshje.
Projekti u përmbyll më 25 tetor 2025, me një sfilatë në kuadër të Albanian Fashion Week, në Pallatin e Kongreseve, ku u prezantuan 10 veshjet e krijuara nga të rinjtë.
