“Me Trashëgiminë në Turizëm”, i organizuar nga Tradita Popullore, synoi promovimin e turizmit kulturor në Shqipëri përmes prezantimit të veshjeve, valleve dhe elementëve të ndryshëm të trashëgimisë kulturore shqiptare, duke krijuar përvoja të drejtpërdrejta për turistët vendas dhe të huaj.
Projekti u zhvillua përmes tre aktiviteteve në Tiranë dhe Vlorë. Aktiviteti i parë u organizua në Sheshin Skënderbej, ku u prezantuan veshje dhe valle tradicionale të Qarkut të Tiranës dhe Fierit, së bashku me Muzeun Lëvizës të trashëgimisë kulturore.
Aktiviteti i dytë u zhvillua në Lungomare, Vlorë, gjatë sezonit veror, me fokus veshjet dhe vallet e Shqipërisë së Veriut, veçanërisht veshjen tradicionale të Hasit. Përmes një formati interaktiv, turistët u përfshinë drejtpërdrejt në valle dhe patën mundësinë të njiheshin nga afër me elementët e veshjeve tradicionale.
Aktiviteti i tretë u zhvillua në Sheshin Sulejman Pasha në Tiranë, në kuadër të festave kombëtare, ku u prezantuan veshje dhe valle nga Gjirokastra, Korça, Pogradeci dhe Tirana.
Nëpërmjet këtyre aktiviteteve, Tradita Popullore solli trashëgiminë kulturore shqiptare më pranë publikut dhe turistëve, duke e kthyer atë në një përvojë të gjallë, interaktive dhe të aksesueshme për vizitorët.
