Tradita Popullore dhe drejtuesja e saj, Edlira Sulaj, u bënë pjesë e “Peza n’Fest”, një ditë kjo e veçantë, ku historia, kultura dhe trashëgimia jonë u sollën më pranë publikut dhe brezit të ri.
Tradita Popullore, në bashkëpunim me Agjencinë e Parqeve dhe Rekreacionit të Bashkisë Tiranë, përmes memorandumit të bashkëpunimit, ishte e pranishme në këtë aktivitet kulturor, duke sjellë në vëmendje vlerat e trashëgimisë sonë materiale dhe shpirtërore.
Këndi i Traditës Popullore u vizitua nga pjesëmarrës të ardhur nga qytete të ndryshme të Shqipërisë, por një vëmendje të veçantë patën edhe nxënësit e shkollave të zonës.
Me ta zhvilluam një leksion të veçantë mbi veshjet tradicionale shqiptare, duke folur për veçoritë, simbolikën dhe mjeshtërinë që ato mbartin ndër breza. Krahas njohjes me veshjet popullore, fëmijët u njohën edhe me artin e thurjes së qilimave, një tjetër pjesë e rëndësishme e zejeve dhe trashëgimisë sonë artizanale.
Aktivitete të tilla shërbejnë si një urë lidhëse mes brezave, duke afruar të rinjtë me vlerat, simbolet dhe mjeshtërinë e trashëguar ndër vite. Përmes prezantimit dhe praktikimit të këtyre traditave, ruhet identiteti kulturor dhe përcillet më tej pasuria e trashëgimisë popullore shqiptare.
